اليوم باش نحكيلكم على حكاية ردتها بعض الأقلام قضية الموسم.
باش نحكيوا على خروج أمين الشرميطي باش يلعب في ألمانيا, وربي يعينه ويوجهه خير .. وانشاالله ينور هاك النجمة و الهلال ...
أيا سيدي كيف ما تعرفوا لكل, وقتلي يوفى كل موسم, وتقل مواضيع الكورة, ماعون صنعة الجرايد الكل حكايات تنقلات اللاعبين.
ويبداو عادة يتبعوا في كل خبر, ولو موش صحيح, الفائدة الشعب يستهلك في اللي ينشروا فيه.
وكيف من فوق يبدا التنقل هذا أغلى واحد في تاريخ كورتنا, وفيه عدة أطراف متداخلة, ومصالح متعارضة .. يقوى التشويق والزوم يزيد يكبر ..
وبالطبيعة, كيف كل حاجة متعلقة بالكورة عندنا هالأيامات, لازم الحكاية تاخذ طابع جهوي مسوقر ..
أيا سيدي هاو نجيلكم مالاخر : الشبيبة القيروانية, الفريق المكون للاعب, حط روحه طرف في العملية, وولات اتبع في المفاوضات وحتى كيف النجم طلب انتداب لاعب من صنف الأواسط, الشبيبة اشترطت انو النجم يفرط في الشرميطي قبل ...
وقتلي, نورملمون, الشبيبة حقها تتلهى بشؤونها, وتستنى بايها اللي كتب من الصفقة بعد ما اتتم ...
هالتطاول هذا من الشبيبة على النجم, اللي يحبوا الناس وإلا يكرهوا, فريق أكبر منها, وما يجيش بالكل انها تتدخل في شؤونه, قلنا عاده هالتصرفات والمساومات اللي عملتهم الشبيبة, زيد عليها الظروف الي تم فيها انتقال الشرميطي للنجم (قعد عام ما يلعبش ...), زيد عليها أنوا الشبيبة تزود فرق العاصمة بلاعبيها من غير مشاكل وترفض التعامل مع النجم (آخرها صفقة وجدي الدرعي اللي رفضتها الشبيبة) .. كل هذا خلى النجم زادة موش مستعد باش يراعي مصالح هالجمعية الي ما تتعاملش معاه وتتطاول عليه.
في هاشي حاجة ؟ اللاعب لاعب النجم والصفقة صفقته
توة كيف العملية تعملت في صيغة إعارة, مع إمكانية التفويت في اللاعب فيما بعد, الناس الكل ولات سمحت لروحها باش تحكم على أخلاقية الصفقة ..
هذا بيزنس .. آش مدخل الأخلاق ؟ جمعية تحب تعمل أحسن صفقة ليها ... وينو العيب ؟ آشنية المشكلة ؟
علاش حد ما قال اللي أخلاقيا ما يجيش جمعية تعطي لاعبيها للافريقي والترجي, وما تقول لا كان للنجم؟ الإجابة واضحة : هذيكة أمورها ..
امالا بربي ماذا بينا هالأشخاص اللي ما قعدت كان تنبر, تحشم على روحها وتشد ألسنتها و أقلامها على القدح في فريق أكبر منها ومن أمثالها ..
وعاش من عرف قدره ...