إيران .. موش كان كل واحد يكنس قدام داره خير ؟

في ما يخص اللي صاير في إيران ..

 

 

كيفكم تفرجت شوية في التلافز الغربية وفي التلافز العربية .. وقريت شوية مدونات، ولاحظت اللي الناس ماخذة مواقف ظهرتلي غريبة برشة ..

 

وقداش الناس تحب تمارس سلطتها المجانية في الحكم على كل شيء وكل حد ..

 

تي بربي كيفاش الناس الكل في ديارها وتتدعي أنها تعرف آش صاير في إيران في الواقع ..

 

والله أنا بالنسبة ليا .. ما دام الإعلام موجه ومصنصر من الشيرتين .. اعتبرت اللي ما انجمش نعمل رأي موضوعي ..

 

الوضعية اللي نرا فيها : رئيس مفدد العالم على خاطر ما ركحش لأماريكيا، لأنه في الواقع بربي آش عملت إيران لأمريكيا وإلا أوروبا ؟ حتى شي يخليهم حاطين عليها وحاصرينها ..

 

 

ومن شيرة أخرى مترشح مساندته أمريكيا وأوروبا وفدوا كيفاش ما نجحش ..

 

 

كيفاش صارت الحكاية ؟ حتى حد ما يعرف .. وفي النهاية ما هي إلا أمور داخلية إيرانية .. العالم آش مدخله ؟ موش كان كل واحد يكنس قدام داره خير ... على خاطر البلدان الغربية ماهيش ناقصة خرم وخور من عنصرية ومشاكل أخلاقية واقتصادية وحتى صحية وغيره ..

 

وربي يهدي ما خلق