عن بعض المدونات المشبوهة

مرة أخرى نلقى نفسي باش نحكي على بعض البلوغات اللي مصنفة "تونسية"، واللي من خلال محتواها تطرح أكثر من سؤال ..

مبدئيا اللي يحل مدونة، القصد متاعه أنه يعبر على أفكاره وإلا الحاجات اللي تعجبه ..

لكن ثمة بعض المدونات، من خلال الخط اللي تتبع فيه في مقالاتها، والأفكار اللي تصر عليها، تخلينا نتساءل على أهدافها ..

كيف يجي واحد، ويجعل من مدونته، موقع رسمي للتنبير على الإسلام، ولمكافحة كل مظاهر الإسلام في تونس .. هنا الواحد من الطبيعي أنه يتساءل على الأسباب اللي وراء حاجة كيف هكة ...

هذا الكل السيد هذا قضيته في الحياة أنه تونس عربية مسلمة ؟

وإلا ثمة أيادي أخرى تحب تستغل الأنترنات باش تبث أفكار مسمومة تتعلق بتشويه صورة الإسلام في تونس .. وتدعوا إلى مواقف إلحادية حب من حب وكره من كره تعتبر دخيلة على الشعب التونسي .. لأنه الشاذ يحسب ولكن لا يقاس عليه ..

بكل صفة أنا نعتقد اللي مشكلة تونس اليوم ما هيش في أنها بلد مسلم، وإنما الحاجة إلى نهضة أخلاقية وثقافية .. كيف اللي كان الإسلام سبب فيها في العالم الكل في زمن هيمنته على العالم .. واللي غابت علينا كيف ضيعنا ديننا ..

يا سبحان الله، بعد ما كان المبدأ أنه المرأة تستر روحها وتتميز بمناقبها المعنوية، ولات بعض الأصوات تنادي بحق المرأة في العراء، وولات المرا تتمثل أساسا في جسد .. وزيد من فوق اللي تختار أنها تستر روحها تولي تحس روحها عاملة عملة ...

ربنا لا تؤاخذنا بما فعل السفهاء منا،

ربنا لا تؤاخذنا بما فعل السفهاء منا،

ربنا لا تؤاخذنا بما فعل السفهاء منا.

آمين.