مغامرات مواطن في قطار سوسة-تونس

توة عندي مدة من غير كرهبة, الحق الواحد شاف حوايج ما يعرفها شالي عنده كرهبة, ولا حتى تجي على باله

يا سيدي نعلمكم الي وقتلي تعزم باش تاخذ التران, ما عندكم حتى دليل الي باش تسافروا قعودا ... حتى كان تقصوا كونفور موش درجة أولى ..

السبب واضح و خارج عن نطاق الشركة الوطنية للسكك الحديدية, وهو أنو المواطن كرم الله وجهه, على الأقل نسبة باهية, ما عنده حتى أدنى تربية تمنعوا من أنوا كيف يقص درجة ثانية ما ياخذش بلاصة واحد قاصص درجة أولى و ألا كونفور ..

يا سيدي أكثر من هكة .. البارح أنا وغيري واقفين, ما لقيناش كراسي فارغين, أيا سيدي قلت الأناقة خير مالعرعور .. ستنيت حتى جاء مراقب التذاكر, شهر الكنترولور, قالي شبيك واقف .. قلتله عند تسكرتي وما لقيتش بلاصة .. أهوكة بجنبي قد قد .. فما سيدة محترمة, قاعدة .. بجنبها ولدها, عمره ما يفوتش عامين, ما خذ بلاصة وحده..

أيا سيدي, الكنترولور ربي يعينه, دار يلوج لي في بلاصة, شاف الوليد الصغير الي ماخو كرسي وحده, قالي قدام أمه : هاي بلاصتك ... المرا تنبزت أما حطت ولدها في حجرها .. و بدات تخرنن .. خوكم رصاتلي قعدت, تسكرتي في يدي وحاشم اللي خذيت حقي ...

باش تسكت شوية, عملت روحي نخمم بالقوي : آه .. ظاهرلي الكنترولور قالي أقعد هوني عل خاطر يعرف الي الصغار ما يخلصوش, و بالطبيعة ما ينجموش ياخذوا كرسي ..

السيدة المحترمة باقي موش مسلمة : كان في بالي راني قصيتله بلاصه ..

وزيد طلع زوجها في الكرسي الي مقابلني .. بداو زعمه يحكيوا بالألمان .. في بالهم حد ما هو باش يفهمهم ...

أيا سيدي من غير ما نطول عليكم أكثر .. ماهو طلعوا ما همش قاصين جملة وحدة ... والله كيف ما نقوللكم .. وللي هبطوا في بئر بورقبة ما خلصوش .. ريتوشي وقاحة أكثر من هكة ...

والمشكلة الي ما مهمش حالات استثنائية ... نساء كبار متدينات, شباب زعمة نير .. وغيرهم .. الكل ماخذين بلاصة غيرهم .. وعاااااااااااااااااادي جدا ... لا حشمة ولا جعرة .. على مراد الله وبره ..

الحاصل مالأمر .. ما كنت طلعت وقعدت الا بالمرج وتدريع الخلائق .. هذا الكل في حين الحكاية ساهلة برشة : تقص تسكرة وتقعد في بلاصتك ..

ربي يهدي ما خلق

على هامش الجلسة العامة 2008 للنجم

من موقعي كمحب حضر في الجلسة العامة هذي, باش نحاول نمدكم بملاحظاتي :

أولا, الحضور كيف العادة موش في المستوى المأمول, رغم اللي التنظيم كان باهي برشة

ثانيا, حبيت نتكلم, ياخي الشتيوي بنميم أبقاه الله, خزرلي, ما عرفش وجهي, قاللي الله غالب جيت ممخر ... مع العلم اللي فما شكون جاء بعدي وتكلم

ثالثا, تم تكريم خليتنا في تونس .. قال شنوة عملت 100 اشتراك, مع العلم الي في الواقع عملنا 460 اشتراك .. أما سي الشتيوي يا ما جاش يا ما حبش يجرح مشاعر الخلايا الراقدة

رابعا, شخصيا كنت نحبذ أكثر أناقة, موش معقول نحاسبوا هيئة ونائب الرئيس مغيبينه .. ما نيش ندافع عليه .. أما تمنيت الجلسة هذه تتعمل 100 في 100 قانونية ..

خامسا, هانا جينا للجولنب القانونية, الجلسة ما صارتش كيف م يلزم, ومداخلة خميس بن فطوم, اللي فيها ريحة كريفة تشرقع, تم تهميشها وما جاوب عليها حد

سادسا, التغطية للحدث كانت ممتازة على الموقع الرسمي وعلى موقع الأحباء, حاجة باهية باش تقعد للتاريخ .. على حد علمي الجلسات السابقة ما قعدوا منها كان التقارير والمحاضر.

سابعا, عجبتني برشة طريقة التعامل مع المداخلات, بالرغم من أنوا البعض منها كان فيه شوية تهجم, يعني اللي تكلم ما منعوا حد باش يقول اللي يحب .. حاجة باهية .. أهوكة الحاضر يفرز وحده شنوة يشد مالمداخلات

ثامنا, سي معز تميز برحابة صدر كبيرة في تقبل النقد, اللي كان ساعات لاذع شوية, وحاول يجاوب على كل تساؤل, باستثناء للأسف مداخلة خميس كريفة, يا ربي بن فطوم ..

تاسعا, اللوائح المالية تتحمل شوية تساؤلات ما طرحها حد .. مثلا فين مشاو الزوز ملاين دينار الي فضلوا عمناول (2007) .. الحاجة الوحيدة اللي اتطرحت بالهمس, يعني في التراكن, هي : شبيها المداخيل موش كيف ما استننيناها .. وبالطبيعة حد ما عنده الجواب ..

عاشرا, سي معز وعد باش الهيئة الجديدة تاخذ بعين الاعتبار مختلف المقترحات المتعلقة بتسيير النجم, انشاله هذا يتم فيسع وما يتكتبش مع كلام الليل

حادشا, في الواقع, الجلسة انتخابية, تمنيت ندزوا فازتنا و يصوتوا ال790 منخرط في الجمعية, وتكون سابقة في كرتنا نتشرفوا بيها أكثر .. أما شي من هذا ما صار

ثانشا, الزوز اللي رشحوا رواحهم لخطة نائب رئيس انسحبوا في الصباح .. علاش زعمة.. في نفس الوقت, اللي تم تعيينه, يا ربي انتخابه, سي دعلول, يتقولوا الي الفكرة اقترحوها عليه وما جاتش من عنده .. على كل, كان صارت انتخابات بالرسمي راهوا سكتنا الأقاويل والدعايات ..

ثلطاشا, سي معز, على حد علمي, ما قال شي على الموقع الرسمي, وما قالش شكونو مدير الماركتينغ الجديد, وما جاوبش على حكاية المغازة الرسمية .. لا نعرفو وقتاش لا شكون شاددها لا آش بش يبدا فيها ... رغم الي برشة جبدوا عليها الحكايات هذه.

الحاصل, الجلسة تعدات في جو باهي في الجملة, لكن تضمنت بعض النقائص الهامة, وانشاله نتلافاوها في المستقبل, خاصة وأنو جمهور ليتوال ورا الي هو واعي و يستحق باش نتعاملوا معاه كيف ما يلزم (نقصد بالطبيعة حكاية التصويت) .. كان الرئيس معين مهما كان نائب الرئيس على الأقل انجموا ننتخبوه ..

انشاله العام الجاي أحسن

وديما معاك يا ليتوال