يا جماعة يحتمل باش نصدم البعض منكم أما بالنسبة ليا الفترة هذه من كل عام نتقلق برشة من حكاية رأس العام وإلا شنوة ..
الناس تبدى تبرمج وتحرك وتستدعى فيا .. وخاصة ماللي عرست زدت تحصرت .. وأنا الحقيقة ما نحسش نفسي معني بالبيعة هذه ..
توة أنا آش دخلني في عيد متاع نصارى ؟ هو ثمة مسيحي احتفل معايا بالعيد الصغير ؟
يجيشي منه نحتفل بعيد ميلاد حد آخر وإلا بعرس حد آخر وإلا بنجاح جارتي ؟؟؟؟
بكلها مناسبات خاطيتني .. متاع إماليها ..
والله عرفتك باش تسألني شنوة اللي مقلقني في هذا ...
ماو يا سيدي اللي يجيدلي ونقله رأيي يفد ويتقلق كأيني قلتلي اللي هويخلوض وإلا قلتله ما عندكش شخصية .. ما كيف ما تعرفوا التونسي ما يحبش اللي ما يخممش كيفه ..
وحتى من مرتي عمناول تعاسة قصوى كيف قلتلها نشدوا دويرتنا .. وهاو السنة أنا متلف وهي تلمح وتعاود
الحاصل ما نيش عارف وقتاش نوليوا عندنا شخصية في تونس .. تي حتى من بوهم نوال الناس ولات تحتفل بيه .. عيد وثني جملة وحدة ... وسيدهم فالنتان وغيره ... واللي تسأله كيفاش ؟ يقلك الفائدة نحفل ونسكر ونشيخ ...
وربي يهدينا الكل
قال الله تعالي ( إن الله لا يغير ما بقوم حتى يغيروا ما بأنفسهم )( الرعد 11)